كتبت /ثريا حمدى
بقالنا يومين بنسمع إن في فنانة كبيرة مختفية بقالها فترة هتقدم حفل افتتاح المتحف المصري الكبير، والأصابع كلها كانت بتشاور على الفنانة شريهان.
وكتير قالوا إن سوسن أقرب للافتتاح باعتبار ملامحها المصرية الفرعونية، وإن الحدث لايق عليها جدًا.
ولكن السؤال: هل مآنش الأوان إن عبلة كامل تتكرم تكريم يليق بفنانة من أعمدة الفن المصري؟
عبلة مختفية بقالها أكتر من سبع سنين، وفي الوسط ده اللي بيختفي محدش بيفتكره ولا بيسأل عنه، وبيتحول لمجرد ذكرى فنية في السينما أو الدراما، ودمتم سالمين على كده.
أما في حالة عبلة كامل، فالوضع مختلف تمام.
اختفاءها زوّد حب الناس ليها أكتر، والجمهور كان دايمًا بيطالب برجوعها للشاشة من جديد، وناشدوا أكتر من مرة إنها تتكرم في المهرجانات الفنية زي أي فنانة من جيلها.
ونقيب الفنانين، أشرف زكي، اتكلم في الموضوع ده أكتر من مرة، وقال إنه حاول يقنعها بالتكريم في كذا مهرجان وندوة، لكنها كانت دايمًا بترفض، والرد واحد: مش محتاجة تكريم، ووجودها في بيتها وسط أولادها وأحفادها هو التكريم الحقيقي بالنسبالها.
لكن المرة دي، افتتاح المتحف المصري الكبير، فرصة حقيقية لتكريم فنانة بحجم وتقل عبلة كامل، وأظن مافيش حدث أكبر ولا أعظم من كده ممكن يليق بيها بعد الصبر والغياب ده كله.
عبلة كامل تستحق إن العالم كله يشوفها من تاني ويستمتع بحضورها.
ليست هناك تعليقات:
إرسال تعليق