كتبت سما محمد
كهف الوحوش
لو اول مره تسمع عنه فأنت حتسمع عن كهف من اغرب الكهوف في العالم واسطوري بمعني الكلمه وجواه حاجة حب يبلغنا بيها ناس عاشوا من 7000 سنه
و تفتكر بقي الكهف الغريب ده موجود فين
موجود يا سيدي علي ارض مصر وتحديدا في الصحراءالغربيه في منطقة الجلف الكبير بالقرب من الحدود مع السودان و ليبيا
طيب ايه حكايته بالظبط
الكهف ده يا سيدي تم اكتشافه سنه 2002 و مع اكتشافه اكتشفنا حاجه غريبه جدا
طيب هي ايه الحاجه دي
احنا يا سيدي دايما بالنسبه لنا المصريين القدماء هما #الفراعنه و عرفنا عنهم كل حاجه عشان كانوا بيسجلوا كل حاجه عن حياتهم اليوميه و شكل معيشتهم و ده اللي لقيناه علي جدران المعابد و البرديات
طيب المصريين بقي اللي قبل الفراعنه كانوا عايشين ازاي
ده بقي اللي اكتشفوه جوة الكهف ده
اكتشفوا رسومات و لوحات علي جدران الكهف ده رسمها المصريين القدماء اللي عاشوا في العصر الحجري من 7000 سنه وعرفنا من خلالها ازاي المصريين في العصر ده كانوا عايشين وكأنهم كانوا سايبين لنا رساله عشان يعرفونا عنهم و انهم كانوا موجودين
اكتر من 5000 رسمه داخل الكهف بتصور حياة المصريين من 7000 سنه
رسومات بتصور حياتهم اليوميه و حيوانات كانت عايشه في عصرهم و كانوا بياكلوا ايه و بيشتغلوا ايه
و الرسومات بالوان مختلفه زي الاحمر و الاصفر و الابيض و الاسود و كلها في حاله جيده
تخيل اننا عرفنا من الرسومات دي ان الصحراء الغربيه في الوقت ده كان مناخها رطب و كانت ممطره و كان فيها اشجار السافانا اللي موجوده حاليا في غابات #افريقيا وكمان كان فيها بحيره كبيره و بعد كده تحول المناخ الي مناخ جاف و ده غالبا اللي دفع المصريين اللي كانو عايشين في المنطقه دي لتركها و الذهاب الي الوادي
الكهف ده لو دخلته حتحس ان المصريين القدماء عندهم هواية الكتابه علي الجدران و انها في چيناتهم و ان الفراعنه مش اول مصريين يكتبوا تفاصيل حياتهم علي الجدران و انهم امتداد لمصريين اقدم منهم
طيب ليه بقي سموه كهف الوحوش
اتسمي كده يا سيدي لانهم لقوا جوه الكهف رسومات كتير لوحوش و كائنات اسطوريه و حيوانات بدون رأس و بثلاث ارجل و لحد دلوقتي الرسومات دي لغز و مفيش حد عارف يفسرها
تحيا مصر تحيا مصر تحيا مصر
ليست هناك تعليقات:
إرسال تعليق